Uşaqların fərdi inkişafında düzgün iştirak etmək valideynlərin qarşısına böyük məsuliyyət qoyur. Demək olar ki, bütün valideynlər uşaqlarının sağlam, xoşbəxt, və uğurlu olmasını istəyirlər. Uşaqların gələcəkdə hansı ixtisası seçəcəyi, çalışdıqları peşədə uğur qazanmaları və ümumiyyətlə onlarda liderlik bacarıqlarının formalaşması üçün valideynlərin bəzi öhdəlikləri vardır.
Səhvlərdən nəticə çıxarmaqla nümunə olun
Uşaqlara yaxşı nümunə olmaq çox vacibdir. Uşaqlar adətən eşitdiklərini deyil, gördüklərini təqlid edərək böyüyürlər. Valideynlərin uşaqlara hər zaman nümunə olması təbii ki, mümkün deyil. Ancaq səhvə yol verdiyiniz zaman bu səhvlərdən nəticə çıxardığınızı, daima öyrənmək üçün həvəsli olduğunuzu və bu təcrübənizi gələcəkdə praktikaya tətbiq etdiyinizi görən uşaqlar lider olmaq yolunda mühüm addım atmış olacaqlar.
Erkən yaşlardan onlarda məsuliyyət hissini formalaşdırın
Uşaqların mümkün qədər çox məsuliyyət götürmələri və onlara özlərinə uyğun olan tapşırıqların verilməsi, bu tapşırıqların öhdəsindən uğurla gəlib gəlməməsindən asılı olmayaraq, uşaqların inkişafına müsbət təsir göstərir. Plastik boşqabları masadan götürməsi və ya öz çamadanını hazırlaması uşağın məsuliyyət alma və problem həll etmə bacarıqlarını inkişaf etdirəcəkdir. Bununla yanaşı, hadisələr istədiyi kimi cərəyan etmədiyi zaman öz işini özü həll etməyi öyrənən uşağın özünə inamı da yaşıdlarına nəzərən daha yaxşı formalaşacaqdır.
Ailə oyunları oynayın, komanda işini öyrədin
Əsas liderlik bacarıqlarından biri də müxtəlif insanlarla işləyə bilməkdir. Bu bacarığı formalaşdırmağın ən yaxşı üsulu ailəvi oyunlar oynayaraq uşağın da bu oyunlarda rol almasını təşkil etməkdir. İdmanla məşğul olmaq, musiqi qrupları, teatr və ya uşağın maraq göstərdiyi hər hansı bir komanda daxili fəaliyyət bu baxımdan faydalı olacaqdır. Mümkün qədər çox insanla ünsiyyət yaratmaq uşaqların həyatları boyu qarşılaşacaqları situasiyalara hazır olmalarına şərait yaradacaqdır.
Emosional zəkanı inkişaf etdirin
Emosional zəka liderliyin ən mühüm göstəricilərindən biridir. Belə ki, uşaqlara duyğularını başa düşməyi, ifadə etməyi və onlara nəzarət etməyi öyrətmək olduqca vacibdir. Bu, onların liderlik bacarıqlarını da artıracaqdır. Uşağınız uğursuz bir gün keçiribsə, ondan özünü necə hiss etdiyindən bəhs etməsini istəmək və dinləyici olaraq onun hiss və duyğularını başa düşüb problemin həll edilməsi üçün yol göstərmək onun özünü dəyərli hiss etməsinə gətirib çıxaracaqdır.
Problemlərin öhdəsindən gəlməyi öyrədin
Hər şey qaydasında gedərkən pozitiv olmaq çətin deyil, ancaq uğurlu insanlar ən çətin vaxtlarda belə yoluna davam edən insanlardır. Uşaqların etdikləri səhvlərə görə narahat olmaq əvəzinə onları göstərdikləri səylərə görə təqdir etmək və səhvlərindən nəticə çıxara biləcəklərini göstərmək, uşağın bütün bunların uğura gedən yolda bir pillə olduğunu başa düşməsinə kömək edəcəkdir. Uşaqlara Tomas Edison, Albert Eynşteyn kimi dəfələrlə cəhd göstərdikdən sonra uğur qazanmış insanların hekayələrini nəql etmək də effektiv olacaqdır.
Oxuma sevgisi aşılayın
Aparılan araşdırmalara görə, kiçik yaşdan kitab oxumağa başlayan və bunu vərdişə çevirən uşaqların söz bazası zənginləşir, hədəflərinə daha yaxşı yönələ bilirlər. Uşaqlarda kitab oxuma vərdişinin formalaşdırılması üçün müəyyən bir yaş həddi yoxdur, hətta Amerika Pediatriya Akademiyası körpə doğulduğu andan etibarən ona kitab oxunmasını tövsiyə edir.
HR-AZ.com portalının paylaşımlarından xəbərdar olmaq üçün rəsmi
Linkedin və
Telegram səhifələrimizi izləyə bilərsiniz.
Mənbə:
Banco.az
