Təəssüf ki, sonsuz yarış olan həyatımızda çox zaman özümüzü qorumuruq. Dəyərli İR nümayəndələri, Siz bütün namizədləri eyni anda tapa bilməyəcək, bütün vakansiyaları eyni ardıcıllıqla bağlaya bilməyəcəksiniz. Özünüzə istirahət verin. Əbəs yerə demirlər: istirahət edə bilməyən işləyə bilməz. Zamanında dincəlin ki, işlədiyiniz Şirkətdən bezib siz də yeni iş axtarışına çıxmayasınız. Hazırda özüm də məzuniyyətdəyəm. Və bu dəfə sizlərə məhz özümün yorulduğumu göstərən amillərdən danışmaq istəyirəm. Aşağıdakılardan hamısı və ya daha çoxu sizdə də varsa, məncə məzuniyyət haqqında sizin də düşünmək vaxtınız çatıb.
1) CV dəyərləndirərkən, telefonda böyütmək üçün iki barmaq funksiyasından istifadə etməyə cəhd edirsinizsə,
2) Ananız və ya dostunuzun zəngini cavablandırdığınız zaman bəsit olaraq “alo” əvəzi, Şirkətin standart forması ilə rəsmi tərzdə salamlaşırsınızsa,
3) Müsahibə zamanı namizədə sual verirsiniz və əvəzində isə “az öncə mən sizin bu sualınıza cavab vermişdim” kimi cavabı eşidirsinizsə,
4) Mağazada, nəqliyyatda və ya olduğunuz digər məkanlarda insanlara diqqətlə baxır və kimin hansı vəzifəyə uyğun gələcəyi haqqında düşünürsünüzsə,
5) Həftə sonu istirahətinizdə artıq iş təklifi almış namizədin “ya təklifi rədd edərsə” fikri sizi narahat edirsə,
6) Bağlamalı olduğunuz çox sayda vakansiya var deyə, yata bilmirsinizsə,
7) Vakansiya üzrə gələn zənglərə və ya “təsadüfən ofisin qarşısından keçən” namizədlərə empatiyasız yanaşırsınızsa,
8) Bir CV-nin dəyərlənməsində diqqətinizi cəmləməkdə çətinlik çəkir və beləliklə, normalından daha çox zaman ayırırsınızsa,
9) Nəqliyyatda gedərkən müsahibəni telefon vasitəsi ilə davam etdirirsinizsə,
10) Yaxınlarınız ilə istirahət etdiyinizdə "Namizəd zəng edir" və yanınızdakı insanlar bundan bezir və ümumiyyətlə, sizə işdən danışmaq qadağası tez-tez qoyulursa, buna baxmayaraq isə özünüzü saxlaya bilməyib namizədin bütün suallarına cavab verirsinizsə.
Hazırladı: Aygün Ramazanova
HR-AZ.com portalının paylaşımlarından xəbərdar olmaq üçün rəsmi
Linkedin və
Telegram səhifələrimizi izləyə bilərsiniz.
Mənbə:
HR-AZ.com
